លោក Ernesto Valverde
គ្រូបង្វឹករបស់ក្រុម Barcelona បានទទួលស្គាល់ថា
ក្រុមរបស់លោកមិនបានបង្ហាញពីទម្រង់លេងយ៉ាងល្អឥតខ្ចោះរបស់ពួកគេឡើយ
បើទោះបីបានផ្តួលក្រុម Roma ក្នុងលទ្ធផល ៤-១
ក្នុងការប្រកួតក្របខ័ណ្ឌ Champions League
វគ្គ៨ក្រុមចុងក្រោយ ជើងទី១ កាលពីថ្ងៃពុធ ក៏ដោយ។
ការធ្វើឲ្យបាល់ចូលទីខ្លួនឯង២គ្រាប់ពីសំណាក់កីឡាករ Daniele De Rossi និង
Kostas Manolas និងបានស៊ុតបាល់បញ្ចូលទី១គ្រាប់ពីខ្សែការពារ Gerard
Pique បានជួយឲ្យក្រុម Roma នាំមុខ ៣-០
នាកីឡដ្ឋាន Camp
Nou នៅមុនពេលខ្សែប្រយុទ្ធ Edin Dzeko បានវាយបក១គ្រាប់វិញសម្រាប់ក្រុម
Roma។ ប៉ុន្តែ ស្របពេលដែលក្រុមរបស់អ៊ីតាលីមួយនេះ
ហាក់ដូចជាត្រូវចាញ់ក្នុងលទ្ធផលបែបនេះទៅហើយ ខ្សែប្រយុទ្ធ Luis Suarez
បានរក្សាការនាំមុខ៣គ្រាប់សម្រាប់ក្រុមខ្លួនវិញ
តាមរយៈការរកគ្រាប់បាល់ទី៤នៅនាទី ទី៨៧។ លទ្ធផលនេះមានន័យថា Barcelona
នឹងឈានទៅកាន់ប្រទេសអ៊ីតាលីនៅសប្តាហ៍ក្រោយ
ជាមួយនឹងការស្ថិតក្នុងទីតាំងដ៏រឹងមាំទៅកាន់វគ្គ៤ក្រុមចុងក្រោយ
ប៉ុន្តែ ពួកគេមិនបានបង្ហាញពីទម្រង់លេងប្រកបដោយភាពមុតស្រួចឡើយ។
ផ្ទុយទៅវិញ ក្រុមម្ចាស់ផ្ទះបានទទួលអត្ថប្រយោជន៍តាមរយៈការធ្វើឲ្យបាល់ចូលទីខ្លួនឯង២គ្រាប់
និងការខ្ជះខ្ជាយឱកាសរបស់ក្រុម Roma។ ប៉ុន្តែ ទោះបីជាយ៉ាងណា Barcelona ប្រហែលជាមិនអាចជួបជាមួយនឹងគូប្រជែងដ៏ងាយស្រួលបែបនេះឡើយក្នុងវគ្គពាក់កណ្តាលផ្តាច់ព្រ័ត្រ។
លោក Valverde បានឲ្យដឹងថា៖
«យើងមិនបានបង្ហាញពីទម្រង់លេងដ៏ល្អក្នុងការប្រកួតនោះឡើយ។
យើងបានធ្វើឲ្យមានកំហុសជាច្រើន។ យើងបានធ្វើការវាយសម្រុករហ័សពេក
ដោយមិនបានគ្រប់គ្រងស្ថានភាពឲ្យល្អសិនឡើយ»៕
ប្រភពព័ត៌មាន៖
worldsoccertalk
Comments