ក្រុម Paris Saint-Germain
អាចនឹងឈ្នះពានក្របខ័ណ្ឌ Ligue
1 ជាលើកទី៥របស់ពួកគេក្នុងរយៈពេល៦រដូវកាលនៅចុងសប្តាហ៍នេះ
ខណៈដែលក្រុមកំពុងតែនាំមុខដាច់របស់លោក Unai Emery
បន្តដណ្តើមយកពិន្ទុសរុបជាកំណត់ត្រាក្នុងក្របខ័ណ្ឌលីករបស់បារាំង។ PSG អាចនឹងឈ្នះពានលីកជាលើកទី៧របស់ក្លិបនេះ
តាមរយៈការដណ្តើមយកជ័យជម្នះនៅលើទឹកដីក្រុម Saint-Etienne នៅរាត្រីនេះ
ប្រសិនបើក្រុមម្ចាស់ការពារតំណែងជើងឯក Monaco បានរងបរាជ័យនៅលើទឹកដីខ្លួនឯងក្រោមស្នាដៃក្រុម Nantes របស់លោក Claudio Ranieri
ក្នុងរយៈពេល២៤ម៉ោងទៀត។ ក្រោយពីបានឈ្នះពាន League Cup ៥លើកជាប់ៗគ្នា
ក្រុម PSG
កំពុងតែស្ថិតយ៉ាងប្រកៀកក្នុងការបំពេញការឈ្នះពានក្នុងស្រុក៣ក្នុងរដូវកាលតែមួយជាលើកទី២
ខណៈដែលពួកគេក៏បានឈានទៅវគ្គពាក់កណ្តាលផ្តាច់ព្រ័ត្រនៃពាន French Cup ហើយពួកគេក៏អាចនឹងបែកកំណត់ត្រានៃការរកបានពិន្ទុសរុប៩៦ពិន្ទុ
ពីរដូវកាលឆ្នាំ២០១៥-២០១៦ ផងដែរ។ លោក Emery ដែលក្រុមរបស់លោកមាន៨៣ពិន្ទុ និងនៅសល់ការប្រកួត៧លើកទៀតនោះ
បានឲ្យដឹងថា៖ «យើងចង់ឈ្នះ ចង់បន្តការងាររបស់យើង
និងដើរលើផ្លូវរបស់យើង។
យើងនឹងបន្តជាមួយនឹងគោលបំណងនៃការឈ្នះដើម្បីបង្ហាញពីភាពខ្លាំងរបស់យើង»។
គ្រូបង្វឹករូបនេះបានបន្ថែមទៀតថា៖ «យើងចង់រក្សាការលេងឲ្យបានល្អដើម្បីក្លាយជាម្ចាស់ជើងឯក
និងរកឲ្យបានពិន្ទុច្រើនបំផុតតាមដែលអាច»។ ក្រុម PSG នឹងត្រូវអវត្តមានតារាឆ្នើមៗដូចជា Marco Verratti, Julian Draxler និង Dani Alves
សម្រាប់ការធ្វើដំណើរទៅកាន់ទឹកដីក្រុម Saint-Etienne។
ការប្រកួតនេះនឹងចាប់ផ្តើមនៅម៉ោង១:៤៥ទៀបភ្លឺ៕
ប្រភពព័ត៌មាន៖ worldsoccertalk
Comments