លោក Pardew ចែក​ផ្លូវ​ជាមួយ West Brom ក្រោយពី​ឈ្នះ​១លើកក្នុង​ចំណោម​១៨​ប្រកួត

រជ្ជ​កាល​​ក្នុង​រយៈពេល​ដ៏ខ្លី​របស់​លោក Alan Pardew ក្នុងនាម​ជា​អ្នក​ចាត់​ការ​ទូទៅ​របស់​ក្លិប West Bromwich Albion បាន​ឈាន​ដល់​ទី​បញ្ចប់ កាលពីថ្ងៃចន្ទ ក្រោយពី​ការ​រង​បរា​ជ័យ​៨​ប្រកួត​ជាប់​ៗ​គ្នា​ក្នុងក្រប​ខ័ណ្ឌ Premier League ដែល​បាន​ធ្វើ​ឲ្យ​ក្លិប​មាន​មូលដ្ឋាន​នៅ Midlands មួយនេះ លិច​លុងកាន់​តែ​ជ្រៅក្នុង​តំបន់​កាត់ចោល​។ លោក Pardew ដែល​បាន​ចូល​ជំនួស​កន្លែង​របស់​លោក Tony Pulis កាលពី​ចុង​​ខែ​វិច្ឆិកា បាន​ចាក​ចេញ​ដោយ​​ការ​ព្រម​ព្រៀង​ទាំង​សង​ខាង ក្រោយ​ពី​​ការ​ពិភាក្សា​ផ្សេង​ៗ​ជាមួយនឹង​​ប្រធានក្លិបលោក Mark Jenkins បន្ទាប់​ពី​ការ​ចាញ់​ក្នុងលទ្ធផល ២-១ លើ​ទឹកដី​​ខ្លួន​ឯងក្រោមស្នា​ដៃក្រុម Burnley កាល​ពី​ថ្ងៃ​សៅរ៍​។ លទ្ធផល​​ចាញ់​នេះ បាន​ធ្វើ​ឲ្យ​ក្រុម West Brom ដេញ​តាម​ពីក្រោយ​ក្រុម​ស្ថិតក្នុង​តំបន់​សុវត្ថិ​ដល់​ទៅ​១០​ពិន្ទុ ខណៈ​ដែល​នៅ​សល់​ការប្រកួត​ត្រឹម​តែ​៦លើក​ទៀត​ប៉ុណ្ណោះ​នៅ​រដូវកាលនេះ​​។ ខណៈ​ដែល​បន្ថែម​ទៀត​លោក​គ្រូបង្វឹក​ជំនួយ John Carver ក៏​នឹង​ចាក​ចេញដែរ​នោះ ក្លិប West Brom បាន​ឲ្យ​នៅលើ​គេហ​ទំព័រ​របស់​ខ្លួន​ថា៖ «West Bromwich Albion និង​លោក Alan Pardew បាន​យល់​ព្រម​ចែកផ្លូវ​គ្នា ក្រោយពី​ការ​ពិភាក្សា​ផ្សេង​ៗ​រវាង​ភាគី​ទាំង​២​»​។ West Brom បាន​បន្ថែម​ទៀត​ថា៖ «ក្លិប​សូម​ថ្លែង​អំណរ​គុណ​ដល់​លោក Alan និង​លោក John សម្រាប់​ការ​ខិត​ខំ​ប្រឹង​ប្រែង​របស់​ពួក​គេ និង​សូម​ជូន​ព័រ​ឲ្យ​ពួកគេ​ជួប​តែ​សំណាងល្អ​នៅថ្ងៃ​អនា​គត​»​​៕
ប្រភព​ព័ត៌​មាន៖ The Guardian