ខ្សែប្រយុទ្ធ Lionel Messi និងបម្រើខ្សែការពារ Sergio Busquets សុទ្ធសឹងនឹងត្រូវចូលលេងឲ្យក្រុម Barcelona វិញ ក្នុងការប្រកួតក្របខ័ណ្ឌ Champions League វគ្គ៨ក្រុមចុងក្រោយ ជើងទី១ នៅពេលប៉ះជាមួយនឹងក្រុម Roma នាកីឡដ្ឋាន Camp Nou នៅរាត្រីនេះ។ Messi បានអវត្តមានការប្រកួតមិត្តភាពទាំង២លើករបស់ក្រុមបាល់ទាត់ជម្រើសជាតិអាហ្សង់ទីន ក្នុងពេលសម្រាកសម្រាប់យុទ្ធនាការអន្តរជាតិ ដោយសារតែបញ្ហារបួសរសៃពួរគន្លាក់ជើង និងបានចូលលេងក្នុងនាមជាកីឡាករបម្រុងនៅពេលប្រកួតជាមួយនឹងក្រុម Sevilla
កាលពីថ្ងៃសៅរ៍ ដោយនៅពេលនោះ រូបគេបានស៊ុតបាល់បញ្ចូលទីតាមស្មើនៅនាទី ទី៨៦។ ប៉ុន្តែ ទោះបីជាយ៉ាងណា រូបគេបានហ្វឹកហាត់កាលពីថ្ងៃអង្គារ រួមជាមួយនឹង Busquets ដែលមិនបានចូលលេងសោះចាប់តាំងពីបាងឆ្ឆឹងម្រាមជើងរបស់គេ នៅពេលប្រកួតជាមួយនឹងក្រុម Chelsea កាលពី៣សប្តាហ៍មុន។ កីឡាករទាំង២សុទ្ធសឹងត្រូវបានបញ្ចូលឈ្មោះក្នុងក្រុមដែលមានសមាជិកទាំង១៨នាក់របស់ក្រុម Barcelona។ ទាក់ទងនឹងភាពរឹងមាំរបស់ Messi លោក Ernesto Valverde គ្រូបង្វឹករបស់ក្រុម Barcelona បានឲ្យដឹងកាលពីថ្ងៃអង្គារថា៖ «រូបគេមានភាពរឹងមាំល្អជាងថ្ងៃមុន»។ ទាក់ទងនឹង Busquets លោក Valverde បានបញ្ជាក់ថា៖ «រូបគេមិនមានបញ្ហាឡើយ នៅថ្ងៃស្អែកនេះ រូបគេកាន់តែរឹងមាំជាងមុន។ រូបគេជាកីឡាករដ៏សំខាន់ម្នាក់សម្រាប់យើង ក៏ដូចជាសម្រាប់ក្រុមជម្រើសជាតិអេស្ប៉ាញផងដែរ។ យើងដឹងពីកម្រិតលេងរបស់គេ ហើយយើងសង្ឃឹមថា អាចពឹងផ្អែកលើរូបគេនៅថ្ងៃស្អែកនេះ»។ ការប្រកួតនេះនឹងចាប់ផ្តើមនៅម៉ោង១:៤៥ទៀបភ្លឺ៕
ប្រភពព័ត៌មាន៖ worldsoccertalk
Comments