លោក Klopp ដាស់តឿនឲ្យ Liverpool ត្រៀមឲ្យរួចរាល់ដើម្បីទប់នឹងព្យុះភ្លៀងរបស់ Man City រាត្រីនេះ
លោក Jurgen Klopp ជឿជាក់ថា Liverpool ត្រូវតែត្រៀមឲ្យបានរួចរាល់ក្នុងការទប់ទល់នឹង «ការវាយសម្រុកប្រកបដោយព្យុះភ្លៀង» ពីសំណាក់ក្រុម Manchester City ខណៈដែលពួកគេសម្លឹងរកការឈានទៅវគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League ជាលើកទី១ បើគិតចាប់តាំងពីឆ្នាំ២០០៨។ ក្រុម Liverpool នឹងនាំយកការនាំយកក្នុងលទ្ធផល ៣-០ ទៅកាន់ការប្រកួតជើងទី២នៃវគ្គ៨ក្រុមចុងក្រោយនាកីឡដ្ឋាន Etihad នៅរាត្រីនេះ ខណៈដែលលទ្ធផលនេះ សូម្បីតែអ្នកចាត់ការទូទៅផ្ទាល់របស់ពួកគេ ទទួលស្គាល់ថា បានធ្វើឲ្យលោកភ្ញាក់ផ្អើល ហើយពួកគេក៏មិនធ្លាប់ធ្លាក់ចេញពីក្របខ័ណ្ឌអឺរ៉ុបផងដែរ ក្រោយពីដណ្តើមយកការនាំមុខ៣គ្រាប់ ពីការប្រកួតជើងទី១។ ប៉ុន្តែ ទោះបីជាយ៉ាងណា ក្រុមរបស់លោក Klopp បានខ្ជះខ្ជាយការនាំមុខ៣គ្រាប់នៅលើទឹកដីក្រុម Sevilla ក្នុងប្រកួតវគ្គចែកពូលរួចជាស្រេច ស្របពេលដែល Man City បានរកគ្រាប់បាល់បញ្ចូលទីយ៉ាងហោចណាស់៣គ្រាប់ក្នុងការប្រកួត១២លើកលើទឹកដីខ្លួនឯងនៅរដូវកាលនេះ ហើយអ្នកចាត់ការទូទៅនៃក្រុម Liverpool រូបនេះ រំពឹងទុកថាក្រុមរបស់លោក Pep Guardiola នឹងចាប់ផ្តើមជាមួយនឹងការបើកការវាយសម្រុកភ្លាមៗ ដូចក្នុងការប្រកួតរវាងក្រុមស្ថិតក្នុងទីក្រុងតែមួយជាមួយនឹងក្រុម Manchester United កាលពីថ្ងៃសៅរ៍ដែរ។ លោក Klopp បានឲ្យដឹងថា៖ «ខ្ញុំមិនចាំបាច់រំឭកដល់កីឡាករទៅលើការប្រកួតដ៏ជាក់លាក់មួយឡើយ។ ប៉ុន្តែ ខ្ញុំបានឃើញការប្រកួតរបស់ក្រុម Man City ជាមួយនឹងក្រុម Man United កាលពីចុងសប្តាហ៍ថ្មីៗនេះ។ វាជាការបង្ហាញពីទម្រង់លេងយ៉ាងល្អក្នុងតង់ទី១ដែលមិនខ្ញុំមិនធ្លាប់បានឃើញមុន»។ គ្រូបង្វឹកសញ្ជាតិអាល្លឺម៉ង់រូបនេះបានបន្ថែមទៀតថា៖ «វាហាក់ដូចជាព្យុះភ្លៀងមួយអ៊ីចឹង។ បន្ទាប់មក ក្នុងតង់ទី២ ពួកគេបានផ្លាស់ប្តូរការប្រកួត។ ក្រោយពីគ្រាប់បាល់ទី១របស់ Man United ក្រុមមួយចាប់ផ្តើមលេងស៊ីចង្វាក់គ្នា ហើយក្រុមមួយទៀតបាត់បង់ភាពស៊ីចង្វាក់គ្នានេះតែម្តង»។ ការប្រកួតនេះនឹងចាប់ផ្តើមនៅម៉ោង១:៤៥ទៀបភ្លឺ៕
ប្រភពព័ត៌មាន៖ The Guardian
Comments