Manchester City នឹងត្រូវអវត្តមានខ្សែប្រយុទ្ធដែលរកបានគ្រាប់បាល់ច្រើនជាងរបស់ក្លិបនេះគឺ Sergio Aguero សម្រាប់ការប្រកួតក្របខ័ណ្ឌ Champions League វគ្គ៨ក្រុមចុងក្រោយជើងទី១ នៅលើទឹកដីក្រុម Liverpool នៅរាត្រីនេះ។ ខ្សែប្រយុទ្ធអន្តរជាតិអាហ្សង់ទីនរូបនេះ ដែលរកបាន៣០គ្រាប់នៅរដូវកាលនេះ បានអវត្តមានរយៈពេល១ខែ ដោយសារតែបញ្ហារបួសជង្គង់។ លោក Pep Guardiola គ្រូបង្វឹក Man City បានប្រកាសកាលពីថ្ងៃអង្គារថា Aguero មិនបានធ្វើដំណើរជាមួយនឹងក្រុមរបស់លោកសម្រាប់ការប្រកួតនាកីឡដ្ឋាន Anfield ឡើយ។ លោក Guardiola បានឲ្យដឹងថា៖ «រូបគេកំពុងតែស្ថិតក្នុងទីក្រុង Manchester។ រូបគេមិនបានមកឡើយ។ គេមានបញ្ហារបួស កាលពី៣សប្តាហ៍មុន ហេតុនេះ នៅមិនទាន់រឹងមាំនៅឡើយទេ»។ ប៉ុន្តែ គ្រូបង្វឹកសញ្ជាតិអេស្ប៉ាញរូបនេះបានបញ្ជាក់ថា ក្រុមរបស់លោក នឹងនៅតែប្រើប្រាស់បច្ចេកទេសលេងបែបវាយសម្រុក ក្នុងពេលជួបក្រុមខ្លាំងរបស់ Liverpool នៅរាត្រីនេះ។ លោក Guardiola បាននិយាយកាលពីថ្ងៃអង្គារថា៖ «ខ្ញុំដឹងថា របៀបដែលយើងលេងគឺល្អសម្រាប់ Liverpool ពីព្រោះពួកគេជាក្រុមមួយដែលវាយសម្រុកបែបនេះ មិនដូចក្រុមផ្សេងក្នុងពិភពលោកឡើយ ជាពិសេស Mane, Salah, Firmino ដែលសុទ្ធជាខ្សែប្រយុទ្ធឆ្នើម»។ គ្រូបង្វឹករូបនេះបានបន្ថែមទៀតថា៖ «ប៉ុន្តែ មធ្យោបាយដ៏ល្អបំផុតក្នុងការឈ្នះ គឺត្រូវធ្វើតាមរបៀបដែលយើងបានធ្វើចាប់តាំងពីយើងស្ថិតនៅទីនេះ»។ Liverpool គឺជាក្រុមតែមួយដែលបានផ្តួលក្រុមខ្លាំង Man City ក្នុងក្របខ័ណ្ឌ Premier League នៅរដូវកាលនេះ ក្រោយពីបានយកឈ្នះក្នុងលទ្ធផល ៤-៣ នាកីឡដ្ឋាន Anfield កាលពីខែមករា។ ការប្រកួតនេះនឹងចាប់ផ្តើមនៅម៉ោង១:៤៥ទៀបភ្លឺ៕
ប្រភពព័ត៌មាន៖ Channel News Asia
Comments