Skip to main content
Ronaldo អាចនឹងជាប់គុករយៈពេល១០ឆ្នាំ លើការបន្លំការបង់ពន្ធ
ខ្សែប្រយុទ្ធអន្តរជាតិព័រទុយហ្គាល់ Cristiano Ronaldo
របស់ក្លិប Real
Madrid និងក្រុមការងារតំណាងរបស់គេ បានផ្លាស់ប្តូរចម្លើយរបស់ខ្លួនទាក់ទងនឹងការបន្លំមិនបង់ពន្ធរបស់គេ
ពីព្រោះរូបគេអាចនឹងប្រឈមមុខនឹងការជាប់គុករយៈពេល១០ឆ្នាំ
សម្រាប់ការចោទប្រកាន់៤ករណី។ តារាឆ្នើមអន្តរជាតិព័រទុយហ្គាល់រូបនេះ ធ្លាប់បាននិយាយកាលពីមុនថា
រូបគេមិនបានធ្វើអ្វីខុសឡើយ។ ប៉ុន្តែ
បើយោងទៅតាមការចេញផ្សាយរបស់កាសែត Cadena Ser និង AS ក្រុមមន្ត្រីជំនាញដែលស្នើដោយមេធាវីរបស់គេ
បច្ចុប្បន្នបានយល់ព្រមជាមួយនឹងអាជ្ញាធរពន្ធដារ ថា កីឡាករ Ronaldo
បានបន្លំការបង់ពន្ធក្នុងទឹកប្រាក់១៤,៧លានអឺរ៉ូ (ស្មើនឹង១៨លានដុល្លារអាមេរិក)
ពិតប្រាកដមែន។ មន្ត្រីជំនាញទាំងនោះ
ដែលត្រូវបានស្នើដោយមេធាវីរបស់ Ronaldo
គឺជាមន្ត្រីអាជីពទាំង៣នាក់មកពីការិយាល័យជាតិផ្នែកពន្ធដារអន្តរជាតិ
ដែលជាអង្គភាពរបស់អាជ្ញាធររបស់អេស្ប៉ាញ។ មន្ត្រីទាំងនោះ
ត្រូវបានចោទសួរអស់រយៈពេល៤ម៉ោង ដោយតុលាការក្នុងទីក្រុង Pozuela de Alarcon
ក្បែរទីក្រុងម៉ាឌ្រីដ និងបានយល់ស្របគ្នាថា កីឡាកររូបនេះពិតជាបានបន្លំការបង់ពន្ធក្នុងទឹកប្រាក់១៤,៧លានអឺរ៉ូ
ក្នុងរយៈពេល៤ឆ្នាំចាប់ពីឆ្នាំ២០១១ និង២០១៤ មែន។
មន្ត្រីជំនាញទាំងនោះបានច្រានចោលការចាត់វិធានការផ្នែកច្បាប់ប្រឆាំងនឹងក្រុមការងាររបស់
Ronaldo
ដែលបានព្យាយាមលើកហេតុផលថា ចំណូលរបស់គេពីការលក់សិទ្ធិលើរូបភាព
គឺជាចំណូលបានមកពីចលនទ្រព្យ (ដែលគិតពន្ធទាបជាង) មិនមែនជាចំណូលការងារឡើយ។
Ronaldo
បច្ចុប្បន្ន នឹងត្រូវបង្ខំឲ្យធ្វើការចរចាជាមួយនឹងអាជ្ញាធរពន្ធដារ
បើមិនអ៊ីចឹងទេ នឹងត្រូវកោះហៅឲ្យឡើងតុលាការ
ដែលជាកន្លែងរូបគេអាចនឹងប្រឈមមុខនឹងការជាប់គុក១០ឆ្នាំ៕
ប្រភពព័ត៌មាន៖ AS
Comments