Isco រកបាន៣គ្រាប់ ខណៈអេស្ប៉ាញ ផ្តល់ការអាម៉ាស់ដ៏ធំដល់ អាហ្សង់ទីន

Isco បានស៊ុតបាល់បញ្ចូលទី៣គ្រាប់ ខណៈដែលក្រុមបាល់ទាត់ជម្រើសជាតិអេស្ប៉ាញ បានកម្តៅសាច់ដុំសម្រាប់ព្រឹត្តិការណ៍ World Cup តាមរយៈការផ្តួលក្រុមម្ចាស់ជើងឯករងឆ្នាំ២០១៤ អាហ្សង់ទីន យ៉ាងចាស់ដៃក្នុងលទ្ធផល ៦-១ ក្នុងការប្រកួតកាលពីថ្ងៃអង្គារ។ ក្រុមបាល់ទាត់ជម្រើសជាតិអេស្ប៉ាញ បាននាំមុខ ២-០ យ៉ាងរហ័ស នៅពេលដែលខ្សែប្រយុទ្ធ Diego Costa បានស៊ុតបាល់ផុតដៃអ្នកចាំទី Sergio Romero នៅមុនពេល Isco បានបន្ថែមគ្រាប់បាល់១គ្រាប់ទៀត។ ក្រុមជម្រើសជាតិអាហ្សង់ទីន ដែលបានអវត្តមានតារាឆ្នើម Lionel Messi នោះ បានវាយបកបាន១គ្រាប់វិញ តាមរយៈខ្សែការពារ Nicolas Otamendi។ ប៉ុន្តែ ខ្សែបម្រើ Isco និង Thiago Alcantara បានបន្ថែមការនាំមុខរបស់ក្រុមខ្លួនក្នុងលទ្ធផល ៤-១ ខណៈដែលខ្សែបម្រើ Iago Aspas បានបន្ថែមគ្រាប់បាល់ទី៥ នៅមុនពេល Isco បានបំពេញការរកគ្រាប់បាល់ទី៣របស់គេក្នុងរយៈពេល១៦នាទីចុងក្រោយ។ ក្រុមជម្រើសជាតិអេស្ប៉ាញ ដែលជាម្ចាស់ជើងឯក World Cup ឆ្នាំ២០១០នោះ បច្ចុប្បន្ន មិនស្គាល់ចាញ់សោះពីការប្រកួត១៨លើកចុងក្រោយរបស់ពួកគេ ចាប់តាំងពីលោក Julen Lopetegui បានចូលកាន់តំណែង ក្រោយពីការធ្លាក់ចេញត្រឹមវគ្គ១៦ក្រុមចុងក្រោយ នៃព្រឹត្តិការណ៍ Euro ឆ្នាំ២០១៦។ ក្រុមជម្រើសជាតិអេស្ប៉ាញ នៅសល់ការប្រកួតមិត្តភាព២លើកទៀត ពោលគឺជាមួយឹនងក្រុមជម្រើសជាតិស្វ៊ីស និងទុយនីស៊ី នៅមុនពេលពួកគេចាប់ផ្តើមយុទ្ធនាការ World Cup របស់ពួកគេ ជាមួយនឹងក្រុមម្ចាស់ជើងឯកទ្វីបអឺរ៉ុប ព័រទុយហ្គាល់ នាថ្ងៃទី១៥ ខែមិថុនា ឆ្នាំ២០១៨៕
ប្រភពព័ត៌មាន៖ BBC